वीताखिलविषयेच्छं जातानन्दाश्रुपुलकमत्यच्छम् ।
सीतापतिदूताद्यं वातात्मजमद्य भावये हृद्यम् ॥ १ ॥

vītākhilaviṣayecchaṃ jātānandāśrupulakamatyaccham ;
sītāpatidūtādyaṃ vātātmajamadya bhāvaye hṛdyam . 1 .

तरुणारुणमुखकमलं करुणारसपूरपूरितापाङ्गम् ।
सञ्जीवनमाशासे मञ्जुलमहिमानमञ्जनाभाग्यम् ॥ २ ॥

taruṇāruṇamukhakamalaṃ karuṇārasapūrapūritāpāṅgam ;
sañjīvanamāśāse mañjulamahimānamañjanābhāgyam . 2 .

शम्बरवैरिशरातिगमम्बुजदलविपुललोचनोदारम् ।
कम्बुगलमनिलदिष्टं बिम्बज्वलितोष्ठमेकमवलम्बे ॥ ३ ॥

śambaravairiśarātigamambujadalavipulalocanodāram ;
kambugalamaniladiṣṭaṃ bimbajvalitoṣṭhamekamavalambe . 3 .

दूरीकृतसीतार्तिः प्रकटीकृतरामवैभवस्फूर्तिः ।
दारितदशमुखकीर्तिः पुरतो मम भातु हनुमतो मूर्तिः ॥ ४ ॥

dūrīkṛtasītārtiḥ prakaṭīkṛtarāmavaibhavasphūrtiḥ ;
dāritadaśamukhakīrtiḥ purato mama bhātu hanumato mūrtiḥ . 4 .

वानरनिकराध्यक्षं दानवकुलकुमुदरविकरसदृक्षम् ।
दीनजनावनदीक्षं पवनतपःपाकपुञ्जमद्राक्षम् ॥ ५ ॥

vānaranikarādhyakṣaṃ dānavakulakumudaravikarasadṛkṣam ;
dīnajanāvanadīkṣaṃ pavanatapaḥpākapuñjamadrākṣam . 5 .

एतत्पवनसुतस्य स्तोत्रं यः पठति पञ्चरत्नाख्यम् ।
चिरमिह निखिलान्भोगान्भुक्त्वा श्रीरामभक्तिभाग्भवति ॥ ६ ॥

etatpavanasutasya stotraṃ yaḥ paṭhati pañcaratnākhyam ;
ciramiha nikhilānbhogānbhuktvā śrīrāmabhaktibhāgbhavati . 6 .