श्रीविद्ये शिववामभागनिलये श्रीराजराजार्चिते
श्रीनाथादिगुरुस्वरूपविभवे चिन्तामणीपीठिके ।
श्रीवाणीगिरिजानुताङ्घ्रिकमले श्रीशाम्भवि श्रीशिवे
मध्याह्ने मलयध्वजाधिपसुते मां पाहि मीनाम्बिके ॥ १ ॥

śrīvidye śivavāmabhāganilaye śrīrājarājārcite
śrīnāthādigurusvarūpavibhave cintāmaṇīpīṭhike ;
śrīvāṇīgirijānutāṅghrikamale śrīśāmbhavi śrīśive
madhyāhne malayadhvajādhipasute māṃ pāhi mīnāmbike . 1 .

चक्रस्थेऽचपले चराचरजगन्नाथे जगत्पूजिते
आर्तालीवरदे नताभयकरे वक्षोजभारान्विते ।
विद्ये वेदकलापमौलिविदिते विद्युल्लताविग्रहे
मातः पूर्णसुधारसार्द्रहृदये मां पाहि मीनाम्बिके ॥ २ ॥

cakrasthe’capale carācarajagannāthe jagatpūjite
ārtālīvarade natābhayakare vakṣojabhārānvite ;
vidye vedakalāpamaulividite vidyullatāvigrahe
mātaḥ pūrṇasudhārasārdrahṛdaye māṃ pāhi mīnāmbike . 2 .

कोटीराङ्गदरत्नकुण्डलधरे कोदण्डबाणाञ्चिते
कोकाकारकुचद्वयोपरिलसत्प्रालम्बिहाराञ्चिते ।
शिञ्जन्नूपुरपादसारसमणिश्रीपादुकालङ्कृते
मद्दारिद्र्यभुजङ्गगारुडखगे मां पाहि मीनाम्बिके ॥ ३ ॥

koṭīrāṅgadaratnakuṇḍaladhare kodaṇḍabāṇāñcite
kokākārakucadvayoparilasatprālambihārāñcite ;
śiñjannūpurapādasārasamaṇiśrīpādukālaṅkṛte
maddāridryabhujaṅgagāruḍakhage māṃ pāhi mīnāmbike . 3 .

ब्रह्मेशाच्युतगीयमानचरिते प्रेतासनान्तःस्थिते
पाशोदङ्कुशचापबाणकलिते बालेन्दुचूडाञ्चिते ।
बाले बालकुरङ्गलोलनयने बालार्ककोट्युज्ज्वले
मुद्राराधितदेवते मुनिनुते मां पाहि मीनाम्बिके ॥ ४ ॥

brahmeśācyutagīyamānacarite pretāsanāntaḥsthite
pāśodaṅkuśacāpabāṇakalite bālenducūḍāñcite ;
bāle bālakuraṅgalolanayane bālārkakoṭyujjvale
mudrārādhitadevate muninute māṃ pāhi mīnāmbike . 4 .

गन्धर्वामरयक्षपन्नगनुते गङ्गाधरालिङ्गिते
गायत्रीगरुडासने कमलजे सुश्यामले सुस्थिते ।
खातीते खलदारुपावकशिखे खद्योतकोट्युज्ज्वले
मन्त्राराधितदेवते मुनिनुते मां पाहि मीनाम्बिके ॥ ५ ॥

gandharvāmarayakṣapannaganute gaṅgādharāliṅgite
gāyatrīgaruḍāsane kamalaje suśyāmale susthite ;
khātīte khaladārupāvakaśikhe khadyotakoṭyujjvale
mantrārādhitadevate muninute māṃ pāhi mīnāmbike . 5 .

नादे नारदतुम्बुराद्यविनुते नादान्तनादात्मिके
नित्ये नीललतात्मिके निरुपमे नीवारशूकोपमे ।
कान्ते कामकले कदम्बनिलये कामेश्वराङ्कस्थिते
मद्विद्ये मदभीष्टकल्पलतिके मां पाहि मीनाम्बिके ॥ ६ ॥

nāde nāradatumburādyavinute nādāntanādātmike
nitye nīlalatātmike nirupame nīvāraśūkopame ;
kānte kāmakale kadambanilaye kāmeśvarāṅkasthite
madvidye madabhīṣṭakalpalatike māṃ pāhi mīnāmbike . 6 .

वीणानादनिमीलितार्धनयने विस्रस्तचूलीभरे
ताम्बूलारुणपल्लवाधरयुते ताटङ्कहारान्विते ।
श्यामे चन्द्रकलावतंसकलिते कस्तूरिकाफालके
पूर्णे पूर्णकलाभिरामवदने मां पाहि मीनाम्बिके ॥ ७ ॥

vīṇānādanimīlitārdhanayane visrastacūlībhare
tāmbūlāruṇapallavādharayute tāṭaṅkahārānvite ;
śyāme candrakalāvataṃsakalite kastūrikāphālake
pūrṇe pūrṇakalābhirāmavadane māṃ pāhi mīnāmbike . 7 .

शब्दब्रह्ममयी चराचरमयी ज्योतिर्मयी वाङ्मयी
नित्यानन्दमयी निरञ्जनमयी तत्त्वम्मयी चिन्मयी ।
तत्त्वातीतमयी परात्परमयी मायामयी श्रीमयी
सर्वैश्वर्यमयी सदाशिवमयी मां पाहि मीनाम्बिके ॥ ८ ॥

śabdabrahmamayī carācaramayī jyotirmayī vāṅmayī
nityānandamayī nirañjanamayī tattvammayī cinmayī ;
tattvātītamayī parātparamayī māyāmayī śrīmayī
sarvaiśvaryamayī sadāśivamayī māṃ pāhi mīnāmbike . 8 .