श्रीशारदासुप्रभातम् śrīśāradāsuprabhātam
श्रीशारदे जगन्मातः पूर्वा सन्ध्या प्रवर्तते ।
उत्तिष्ठ करुणापाङ्गैः कर्तव्यं विश्वमङ्गलम् ॥१॥
śrīśārade jaganmātaḥ pūrvā sandhyā pravartate ;
uttiṣṭha karuṇāpāṅgaiḥ kartavyaṃ viśvamaṅgalam .1.
श्रीशृङ्गाद्रिपुरीरत्नसिंहासननिवासिनि ।
उत्तिष्ठ शारदाम्ब श्रीशङ्कराचार्यसन्नुते ॥२॥
śrīśṛṅgādripurīratnasiṃhāsananivāsini ;
uttiṣṭha śāradāmba śrīśaṅkarācāryasannute .2.
उत्तिष्ठोत्तिष्ठ भगवत्पादशङ्करमूर्तिभिः ।
जगद्गुरुभिराराध्ये जगज्जननि शारदे ॥३॥
uttiṣṭhottiṣṭha bhagavatpādaśaṅkaramūrtibhiḥ ;
jagadgurubhirārādhye jagajjanani śārade .3.
ब्रह्मर्षयोऽम्ब सनकादय एत्य भक्त्या
ब्राह्मीमनन्यमनसो हृदि ब्रह्मविद्याम् ।
त्वामामनन्त्युपनिषत्सरसीजहंसीं
श्रीशारदाम्ब वरदे तव सुप्रभातम् ॥४॥
brahmarṣayo’mba sanakādaya etya bhaktyā
brāhmīmananyamanaso hṛdi brahmavidyām ;
tvāmāmanantyupaniṣatsarasījahaṃsīṃ
śrīśāradāmba varade tava suprabhātam .4.
फुल्लानि पङ्कजवनानि सतां मनांसि
धीवृत्तयश्च सरितश्च दिशः प्रसन्नाः ।
अज्ञानमाशु तिमिरं च विलीयतेम्ब
श्रीशारदे विजयते तव सुप्रभातम् ॥५॥
phullāni paṅkajavanāni satāṃ manāṃsi
dhīvṛttayaśca saritaśca diśaḥ prasannāḥ ;
ajñānamāśu timiraṃ ca vilīyatemba
śrīśārade vijayate tava suprabhātam .5.
हंसः प्रयात्युदयमम्बुजकाननेषु
हंसाः प्रसन्नमनसो मुदिता रमन्ते ।
हंसात्मना परमहंसकुलं मुदास्ते
श्रीशारदे विजयते तव सुप्रभातम् ॥६॥
haṃsaḥ prayātyudayamambujakānaneṣu
haṃsāḥ prasannamanaso muditā ramante ;
haṃsātmanā paramahaṃsakulaṃ mudāste
śrīśārade vijayate tava suprabhātam .6.
श्रद्धाधनाश्शमदमादियुता विनेयाः
शुद्धाशया विदलिताखिलकर्मबन्धाः ।
अद्धा विमुक्तिपदभाज इमे ब्रुवन्ति
श्रीशारदाम्ब विमलं तव सुप्रभातम् ॥७॥
śraddhādhanāśśamadamādiyutā vineyāḥ
śuddhāśayā vidalitākhilakarmabandhāḥ ;
addhā vimuktipadabhāja ime bruvanti
śrīśāradāmba vimalaṃ tava suprabhātam .7.
गीर्वाणवृन्दमखिलं पुरतो विधाय
गीर्वाणवन्द्यमुपयात्युचितोपहारैः ।
शर्वादिसन्नुतपदामिह सेवितुं त्वां
श्रीशारदाम्ब शिवदं तव सुप्रभातम् ॥८॥
gīrvāṇavṛndamakhilaṃ purato vidhāya
gīrvāṇavandyamupayātyucitopahāraiḥ ;
śarvādisannutapadāmiha sevituṃ tvāṃ
śrīśāradāmba śivadaṃ tava suprabhātam .8.
सर्वार्तिहारिणि समस्तसुखप्रदात्रि
दुर्वादिगर्वशमयित्रि जगज्जनित्रि ।
निर्वाणदात्रि निगमान्तविबोधयित्रि
श्रीशारदे शिवसहोदरि सुप्रभातम् ॥९॥
sarvārtihāriṇi samastasukhapradātri
durvādigarvaśamayitri jagajjanitri ;
nirvāṇadātri nigamāntavibodhayitri
śrīśārade śivasahodari suprabhātam .9.
सद्वेदशास्त्रनिगमान्तरहस्यविज्ञाः
प्राज्ञास्त्वदङ्घ्रिसरसीजपरागगन्धम् ।
आघ्राय दिव्यमभवन्नखिलाः कृतार्थाः
श्रीशारदे सुमनसस्तव सुप्रभातम् ॥१०॥
sadvedaśāstranigamāntarahasyavijñāḥ
prājñāstvadaṅghrisarasījaparāgagandham ;
āghrāya divyamabhavannakhilāḥ kṛtārthāḥ
śrīśārade sumanasastava suprabhātam .10.
मुक्तिः स्थिता करतले हृदये प्रमोदः
जिह्वाग्रगाश्च सहसैव समस्तविद्याः ।
त्वद्दर्शनं भवति यस्य हि तस्य पुंसः
श्रीशारदाम्ब शुभदं तव सुप्रभातम् ॥११॥
muktiḥ sthitā karatale hṛdaye pramodaḥ
jihvāgragāśca sahasaiva samastavidyāḥ ;
tvaddarśanaṃ bhavati yasya hi tasya puṃsaḥ
śrīśāradāmba śubhadaṃ tava suprabhātam .11.
त्वत्संस्मृतेरपि नरं विजहात्यलक्ष्मीः
लक्ष्मीस्समाश्रयति नूनमचञ्चलाम्ब ।
श्रद्धावतां त्वयि विमुक्तिरयत्नसिद्धा
श्रीशारदे जगदधीश्वरि सुप्रभातम् ॥१२॥
tvatsaṃsmṛterapi naraṃ vijahātyalakṣmīḥ
lakṣmīssamāśrayati nūnamacañcalāmba ;
śraddhāvatāṃ tvayi vimuktirayatnasiddhā
śrīśārade jagadadhīśvari suprabhātam .12.
ब्रह्मात्मभावमधिगम्य हृदा सदात्मा-
रामा अपि त्वदमलाङ्घ्रिसरोजरेणून् ।
वाञ्छन्त्यमी परमहंसकुलावतंसाः
श्रीशारदाम्ब हृदये तव सुप्रभातम् ॥१३ ॥
brahmātmabhāvamadhigamya hṛdā sadātmā-
rāmā api tvadamalāṅghrisarojareṇūn ;
vāñchantyamī paramahaṃsakulāvataṃsāḥ
śrīśāradāmba hṛdaye tava suprabhātam .13 .
तुङ्गासरिद्विमलवारितरङ्गरङ्ग-
रिङ्गत्सरोजवनदिव्यसुगन्धवाहः।
अङ्गीकुरुष्व पवनः प्रकरोति सेवां
श्रीशारदाम्ब कृपया तव सुप्रभातम् ॥१४ ॥
tuṅgāsaridvimalavāritaraṅgaraṅga-
riṅgatsarojavanadivyasugandhavāhaḥ;
aṅgīkuruṣva pavanaḥ prakaroti sevāṃ
śrīśāradāmba kṛpayā tava suprabhātam .14 .
प्राक्सिन्धुपाथसि त्रयीतनुरेष भक्त्या
स्नातस्तथोदयगिरावुदितस्तपस्वी ।
त्वत्पादपद्मभजनाय सहस्रभानुः
श्रीशारदाम्ब समुदेति च सुप्रभातम् ॥१५॥
prāksindhupāthasi trayītanureṣa bhaktyā
snātastathodayagirāvuditastapasvī ;
tvatpādapadmabhajanāya sahasrabhānuḥ
śrīśāradāmba samudeti ca suprabhātam .15.
ब्रह्माच्युतत्रिनयना विनयेन भक्त्या
सिंहासने स्थितवतीं प्रणवस्वरूपाम् ।
वाचा हृदा च वपुषा च समाश्रयन्ति
श्रीशारदाम्ब परमेश्वरि सुप्रभातम् ॥१६ ॥
brahmācyutatrinayanā vinayena bhaktyā
siṃhāsane sthitavatīṃ praṇavasvarūpām ;
vācā hṛdā ca vapuṣā ca samāśrayanti
śrīśāradāmba parameśvari suprabhātam .16 .
इन्द्रानलादय इमे दिगधीश्वराश्च
सूर्येन्दुभौमबुधगीष्पतिशुक्रमुख्याः।
सर्वे ग्रहाश्च भयभक्तियुता नमन्ति
श्रीशारदे तव महेश्वरि सुप्रभातम् ॥१७ ॥
indrānalādaya ime digadhīśvarāśca
sūryendubhaumabudhagīṣpatiśukramukhyāḥ;
sarve grahāśca bhayabhaktiyutā namanti
śrīśārade tava maheśvari suprabhātam .17 .
देवाङ्गनामणिगणश्च शचीमुखोऽयं
त्वामीश्वरीं त्रिजगदेकसमर्चनीयाम् ।
संसेवितुं सुसमये समुपागतोऽस्मिन्
श्रीशारदाम्ब विनुते तव सुप्रभातम् ॥१८ ॥
devāṅganāmaṇigaṇaśca śacīmukho’yaṃ
tvāmīśvarīṃ trijagadekasamarcanīyām ;
saṃsevituṃ susamaye samupāgato’smin
śrīśāradāmba vinute tava suprabhātam .18 .
वाचा सुधामधुरया रमणीयसप्त-
तन्त्रीप्रकर्षमधुरस्वनया महत्या ।
देवर्षिवर्य इह गायति भक्तिनम्रः
श्रीशारदाम्ब मधुरं तव सुप्रभातम् ॥१९ ॥
vācā sudhāmadhurayā ramaṇīyasapta-
tantrīprakarṣamadhurasvanayā mahatyā ;
devarṣivarya iha gāyati bhaktinamraḥ
śrīśāradāmba madhuraṃ tava suprabhātam .19 .
त्वत्पादपङ्कजपरागसुगन्धलेश-
माघ्राय सत्कविमदभ्रमराः प्रहृष्टाः ।
गायन्ति कोमलमनोहरवृत्तपद्यैः
श्रीशारदाम्ब ललितैस्तव सुप्रभातम् ॥२०॥
tvatpādapaṅkajaparāgasugandhaleśa-
māghrāya satkavimadabhramarāḥ prahṛṣṭāḥ ;
gāyanti komalamanoharavṛttapadyaiḥ
śrīśāradāmba lalitaistava suprabhātam .20.
श्रीव्यासशङ्करसुरेश्वरपद्मपादा-
द्याचार्यवर्यपरिपूजितपादपद्मे ।
लीलाशुकाक्षवलयोज्ज्वलपाणिपद्मे
श्रीशारदाम्ब परमे तव सुप्रभातम् ॥२१॥
śrīvyāsaśaṅkarasureśvarapadmapādā-
dyācāryavaryaparipūjitapādapadme ;
līlāśukākṣavalayojjvalapāṇipadme
śrīśāradāmba parame tava suprabhātam .21.
पद्माक्षि पद्ममुखि पद्मभवादिवन्द्ये
पद्मालयेऽखिलवराभयपाणिपद्मे ।
हृत्पद्मपीठमधितिष्ठ ममापि मातः
श्रीशारदे करुणया तव सुप्रभातम् ॥२२॥
padmākṣi padmamukhi padmabhavādivandye
padmālaye’khilavarābhayapāṇipadme ;
hṛtpadmapīṭhamadhitiṣṭha mamāpi mātaḥ
śrīśārade karuṇayā tava suprabhātam .22.
यः पुस्तकाक्षवलयाञ्चितपाणिपद्मां
वागीश्वरीं हृदयपद्मगतां स्मरेत्त्वाम् ।
वागीशतां समुपयाति स सद्य एव
श्रीशारदाम्ब भुवने तव सुप्रभातम् ॥२३॥
yaḥ pustakākṣavalayāñcitapāṇipadmāṃ
vāgīśvarīṃ hṛdayapadmagatāṃ smarettvām ;
vāgīśatāṃ samupayāti sa sadya eva
śrīśāradāmba bhuvane tava suprabhātam .23.
संसारसागरमपारमनन्तलोल-
कल्लोलदुर्ललितमेतमतीत्य तूर्णम् ।
तीर्णः स्वयं स खलु तारयति श्रितांश्च
श्रीशारदे स्मरति यस्तव सुप्रभातम् ||२४ ॥
saṃsārasāgaramapāramanantalola-
kalloladurlalitametamatītya tūrṇam ;
tīrṇaḥ svayaṃ sa khalu tārayati śritāṃśca
śrīśārade smarati yastava suprabhātam ||24 .
राकाशशाङ्करमणीयमनोज्ञकान्तिं
सोमावतंसमकुटां सुमकोमलाङ्गीम् ।
त्वां संस्मरामि कृपयैव विलोकयन्तीं
श्रीशारदाम्ब हृदि मां तव सुप्रभातम् ॥२५॥
rākāśaśāṅkaramaṇīyamanojñakāntiṃ
somāvataṃsamakuṭāṃ sumakomalāṅgīm ;
tvāṃ saṃsmarāmi kṛpayaiva vilokayantīṃ
śrīśāradāmba hṛdi māṃ tava suprabhātam .25.
दातुं त्रिवर्गमपवर्गमपि त्रिलोक्याः
नूनं निजस्मरणतोऽपि समेधमाने ।
त्वद्वक्त्रचन्द्रमसि चन्द्रमसापयातं
श्रीशारदाम्ब शशिना तव सुप्रभातम् ॥२६।
dātuṃ trivargamapavargamapi trilokyāḥ
nūnaṃ nijasmaraṇato’pi samedhamāne ;
tvadvaktracandramasi candramasāpayātaṃ
śrīśāradāmba śaśinā tava suprabhātam .26;
पूर्णे कलङ्करहिते भुवनार्तिहारि-
ण्यज्ञानसन्तमसभेदिनि त्वन्मुखेन्दौ ।
नित्योदिते जगति भक्तचकोरलोकः
श्रीशारदाम्ब मुदितस्तव सुप्रभातम् ॥२७॥
pūrṇe kalaṅkarahite bhuvanārtihāri-
ṇyajñānasantamasabhedini tvanmukhendau ;
nityodite jagati bhaktacakoralokaḥ
śrīśāradāmba muditastava suprabhātam .27.
पुण्याः स्त्रियश्च पुरुषाश्च कलावपि त्वां
मातर्यथा कृतयुगे परयाम्ब भक्त्या ।
संसेव्य शृङ्गगिरिपीठगतां कृतार्थाः
श्रीशारदे कृतधियस्तव सुप्रभातम् ॥२८ ॥
puṇyāḥ striyaśca puruṣāśca kalāvapi tvāṃ
mātaryathā kṛtayuge parayāmba bhaktyā ;
saṃsevya śṛṅgagiripīṭhagatāṃ kṛtārthāḥ
śrīśārade kṛtadhiyastava suprabhātam .28 .
त्वत्सेवनाय भवबन्धविमुक्तिकामाः
कारुण्यकल्पलतिके कतिचिन्महान्तः ।
आयान्ति शुद्धचरितास्सुधियश्च भक्ताः
श्रीशारदे प्रमुदितास्तव सुप्रभातम् ॥२९॥
tvatsevanāya bhavabandhavimuktikāmāḥ
kāruṇyakalpalatike katicinmahāntaḥ ;
āyānti śuddhacaritāssudhiyaśca bhaktāḥ
śrīśārade pramuditāstava suprabhātam .29.
श्रीचन्द्रशेखरजगद्गुरुसार्वभौम-
श्रीपाणिपद्मजजगद्गुरुसार्वभौमैः ।
तत्पाणिपङ्कजसमुत्थगुरूत्तमैश्च
श्रीशारदाम्ब विनुते तव सुप्रभातम् ॥३०॥
śrīcandraśekharajagadgurusārvabhauma-
śrīpāṇipadmajajagadgurusārvabhaumaiḥ ;
tatpāṇipaṅkajasamutthagurūttamaiśca
śrīśāradāmba vinute tava suprabhātam .30.
ये सज्जना अनुदिनं मुदिताः प्रभाते
भक्त्या पठन्ति परया भुवि शारदायाः ।
श्री सुप्रभातविनुतिं सकलैर्विमुक्ताः
क्लेशैः प्रयान्ति पुरुषार्थचतुष्टयं द्राक् ॥३१॥
ye sajjanā anudinaṃ muditāḥ prabhāte
bhaktyā paṭhanti parayā bhuvi śāradāyāḥ ;
śrī suprabhātavinutiṃ sakalairvimuktāḥ
kleśaiḥ prayānti puruṣārthacatuṣṭayaṃ drāk .31.
ये सुप्रभातमिदमाश्रितवत्सलायाः
श्रद्धायुता अनुदिनं हृदि शारदायाः ।
प्रातः पठन्ति मनुजा जगदम्बिकायाः
ते प्राप्नुवन्ति सुजनास्सकलानभीष्टान् ॥३२॥
ye suprabhātamidamāśritavatsalāyāḥ
śraddhāyutā anudinaṃ hṛdi śāradāyāḥ ;
prātaḥ paṭhanti manujā jagadambikāyāḥ
te prāpnuvanti sujanāssakalānabhīṣṭān .32.
श्रीशारदासुप्रभातस्मरणात्करुणानिधिः ।
पारदा स्यात् क्षणेनैवापारसंसारवारिधेः ॥३३॥
śrīśāradāsuprabhātasmaraṇātkaruṇānidhiḥ ;
pāradā syāt kṣaṇenaivāpārasaṃsāravāridheḥ .33.