गुरुस्तुतिशतकात्
gurustutiśatakāt
श्रीविद्याशङ्करायाद्यविद्यातीर्थाभिधाय च ।
लम्बकर्णाय शुद्धाय तस्मै श्रीगुरवे नमः ॥ ६६॥
śrīvidyāśaṅkarāyādyavidyātīrthābhidhāya ca ;
lambakarṇāya śuddhāya tasmai śrīgurave namaḥ . 66.
अष्टाङ्गलक्षणो धर्मो यस्यातिसुलभोऽभवत् ।
लम्बिकायोगसंस्थाय तस्मै श्रीगुरवे नमः ॥ ६७॥
aṣṭāṅgalakṣaṇo dharmo yasyātisulabho’bhavat ;
lambikāyogasaṃsthāya tasmai śrīgurave namaḥ . 67.
अपारज्ञानसन्दोहविधूततमसे तदा ।
अपारसुखसन्धानविधानपटवे नमः ॥ ६८॥
apārajñānasandohavidhūtatamase tadā ;
apārasukhasandhānavidhānapaṭave namaḥ . 68.
अतीवसुमहत्तेजोमूर्तिध्यानपराय च ।
अतीतभवसङ्गाय तस्मै श्रीगुरवे नमः ॥ ६९॥
atīvasumahattejomūrtidhyānaparāya ca ;
atītabhavasaṅgāya tasmai śrīgurave namaḥ . 69.
सदोत्तुङ्गतरङ्गाख्यातुङ्गभद्रातटे शुभे ।
पूर्णब्रह्मैकनिष्ठाय तस्मै श्रीगुरवे नमः ॥ ७०॥
sadottuṅgataraṅgākhyātuṅgabhadrātaṭe śubhe ;
pūrṇabrahmaikaniṣṭhāya tasmai śrīgurave namaḥ . 70.
भारतीसंप्रदायस्य रत्नभूताय धीमते ।
भारतीकृष्णतीर्थाय तस्मै श्रीगुरवे नमः ॥ ७१॥
bhāratīsaṃpradāyasya ratnabhūtāya dhīmate ;
bhāratīkṛṣṇatīrthāya tasmai śrīgurave namaḥ . 71.
विद्यारण्यमुनीशाय विद्यारण्येषु नित्यशः ।
चरत्केसरिणे माद्यद्विद्वत्कुञ्जरवैरिणे ॥ ७२॥
vidyāraṇyamunīśāya vidyāraṇyeṣu nityaśaḥ ;
caratkesariṇe mādyadvidvatkuñjaravairiṇe . 72.
सुप्रसिद्धमहाग्रन्थकरणे करुणान्विता ।
वशगा यस्य वागीशा तस्मै श्रीगुरवे नमः ॥ ७३॥
suprasiddhamahāgranthakaraṇe karuṇānvitā ;
vaśagā yasya vāgīśā tasmai śrīgurave namaḥ . 73.
योऽभूद्व्याख्यातवेदार्थः प्रज्ञया तपसा तथा ।
कृतस्मृतिपुराणाय तस्मै श्रीगुरवे नमः ॥ ७४॥
yo’bhūdvyākhyātavedārthaḥ prajñayā tapasā tathā ;
kṛtasmṛtipurāṇāya tasmai śrīgurave namaḥ . 74.
विद्यानगरनिर्माणविद्याशतविशारदः ।
विद्यारण्यमहायोगी तस्मै श्रीगुरवे नमः ॥ ७५॥
vidyānagaranirmāṇavidyāśataviśāradaḥ ;
vidyāraṇyamahāyogī tasmai śrīgurave namaḥ . 75.
पुरा हरिहराभिख्यपृथिवीमण्डलेशितुः ।
स्थापको यश्च कालज्ञस्तस्मै श्रीगुरवे नमः ॥ ७६॥
purā hariharābhikhyapṛthivīmaṇḍaleśituḥ ;
sthāpako yaśca kālajñastasmai śrīgurave namaḥ . 76.
श्रीमच्छृङ्गपुरस्थानसिंहासनविधायिने ।
छत्रचामरभूषाय तस्मै श्रीगुरवे नमः ॥ ७७॥
śrīmacchṛṅgapurasthānasiṃhāsanavidhāyine ;
chatracāmarabhūṣāya tasmai śrīgurave namaḥ . 77.
यस्य चान्दोलिकादण्ड एकतो मानुषैर्धृतः ।
एकतो भूतवेतालैस्तस्मै श्रीगुरवे नमः ॥ ७८॥
yasya cāndolikādaṇḍa ekato mānuṣairdhṛtaḥ ;
ekato bhūtavetālaistasmai śrīgurave namaḥ . 78.
नमो लक्ष्मीविलासाय नमस्ते मन्त्रमूर्तये ।
विद्वज्जननिवासाय तस्मै श्रीगुरवे नमः ॥ ७९॥
namo lakṣmīvilāsāya namaste mantramūrtaye ;
vidvajjananivāsāya tasmai śrīgurave namaḥ . 79.
नमो महानुभावाय ज्ञानवैराग्यशालिने ।
नमो विशुद्धभावाय तस्मै श्रीगुरवे नमः ॥ ८०॥
namo mahānubhāvāya jñānavairāgyaśāline ;
namo viśuddhabhāvāya tasmai śrīgurave namaḥ . 80.
नमो भवमहादर्पदलनाय महात्मने ।
आश्चर्यकर्मणे नित्यं तस्मै श्रीगुरवे नमः ॥ ८१॥
namo bhavamahādarpadalanāya mahātmane ;
āścaryakarmaṇe nityaṃ tasmai śrīgurave namaḥ . 81.
इति गुरुत्रयसंस्मरणन्नाम गुरुस्तुतिशतकदुद्धृताः केचन श्लोकाः
iti gurutrayasaṃsmaraṇannāma gurustutiśatakaduddhṛtāḥ kecana ślokāḥ
