श्रीमच्चन्दिरशेखरभारत्यभिधानमाश्रये यमिनम् ।
निरवधिसंसृतिनीरधिमग्नजनोद्धरणबद्धदीक्षं तम् ॥ १ ॥

śrīmaccandiraśekharabhāratyabhidhānamāśraye yaminam ;
niravadhisaṃsṛtinīradhimagnajanoddharaṇabaddhadīkṣaṃ tam . 1 .

काषायाम्बरपरिवृतम् ईषत्स्मितवदनमिष्टदातारम् ।
शेषाख्येयगुणालिं भूषायितशमदमादिकं वन्दे ॥ २ ॥

kāṣāyāmbaraparivṛtam īṣatsmitavadanamiṣṭadātāram ;
śeṣākhyeyaguṇāliṃ bhūṣāyitaśamadamādikaṃ vande . 2 .

गाङ्गझरीसमवाचं स्वाङ्गत्विण्णिर्जिताच्छगाङ्गेयम् ।
माङ्गलिकमाश्रयेऽहं जाङ्गलिकं भवमहाविषस्येशम् ॥ ३ ॥

gāṅgajharīsamavācaṃ svāṅgatviṇṇirjitācchagāṅgeyam ;
māṅgalikamāśraye’haṃ jāṅgalikaṃ bhavamahāviṣasyeśam . 3 .

करुणामृतसरिदीशं गुरुणाऽपि स्तुत्यमतुलधीयुक्तम् ।
तरुणारुणवदनाब्जं च नृणां गम्यं तमाश्रये सततम् ॥ ४ ॥

karuṇāmṛtasaridīśaṃ guruṇā’pi stutyamatuladhīyuktam ;
taruṇāruṇavadanābjaṃ ca nṛṇāṃ gamyaṃ tamāśraye satatam . 4 .

अतिवेलमधुरभाषितमतितरलस्वान्तमखिलवन्द्यपदम् ।
यतिवर्यं हृदि कलये मतिमान्द्यस्यापनुत्तये सततम् ॥ ५ ॥

ativelamadhurabhāṣitamatitaralasvāntamakhilavandyapadam ;
yativaryaṃ hṛdi kalaye matimāndyasyāpanuttaye satatam . 5 .

पालितनिजभक्तततिं शीलितवेदान्तगूढतत्त्वं तम् ।
मीलितलोचनयुगलं लालितभुवनत्रयं नमामि सदा ॥ ६ ॥

pālitanijabhaktatatiṃ śīlitavedāntagūḍhatattvaṃ tam ;
mīlitalocanayugalaṃ lālitabhuvanatrayaṃ namāmi sadā . 6 .

राकाशशिनिभवक्त्रं पाकारिप्रमुखकीर्त्यचारित्रम् ।
आकाशकेशभक्तं शोकापहमाश्रये गुरूत्तंसम् ॥ ७ ॥

rākāśaśinibhavaktraṃ pākāripramukhakīrtyacāritram ;
ākāśakeśabhaktaṃ śokāpahamāśraye gurūttaṃsam . 7 .

तापारण्यकृशानुं भूपालकवन्दनीयपदयुगलम् ।
पापापहनामानं शापानुग्रहसमर्थमहमीडे ॥ ८ ॥

tāpāraṇyakṛśānuṃ bhūpālakavandanīyapadayugalam ;
pāpāpahanāmānaṃ śāpānugrahasamarthamahamīḍe . 8 .

शङ्करदेशिकविरचितपीठाधिपमालिकामहारत्नम् ।
प्रणमामि चन्द्रशेखरभारत्यभिधानदेशिकं हृदये ॥ ९ ॥

śaṅkaradeśikaviracitapīṭhādhipamālikāmahāratnam ;
praṇamāmi candraśekharabhāratyabhidhānadeśikaṃ hṛdaye . 9 .