मनोनिवृत्तिः परमोपशान्तिः
सा तीर्थवर्या मणिकर्णिका च ।
ज्ञानप्रवाहा विमलादिगङ्गा
सा काशिकाऽहं निजबोधरूपा ॥ १ ॥

manonivṛttiḥ paramopaśāntiḥ
sā tīrthavaryā maṇikarṇikā ca ;
jñānapravāhā vimalādigaṅgā
sā kāśikā’haṃ nijabodharūpā . 1 .

यस्यामिदं कल्पितमिन्द्रजालं
चराचरं भाति मनोविलासम् ।
सच्चित्सुखैका परमात्मरूपा
सा काशिकाऽहं निजबोधरूपा ॥ २ ॥

yasyāmidaṃ kalpitamindrajālaṃ
carācaraṃ bhāti manovilāsam ;
saccitsukhaikā paramātmarūpā
sā kāśikā’haṃ nijabodharūpā . 2 .

कोशेषु पञ्चस्वधिराजमाना
बुद्धिर्भवानी प्रतिदेहगेहम् ।
साक्षी शिवः सर्वगतोऽन्तरात्मा
सा काशिकाऽहं निजबोधरूपा ॥ ३ ॥

kośeṣu pañcasvadhirājamānā
buddhirbhavānī pratidehageham ;
sākṣī śivaḥ sarvagato’ntarātmā
sā kāśikā’haṃ nijabodharūpā . 3 .

काश्यां हि काशते काशी काशी सर्वप्रकाशिका ।
सा काशी विदिता येन तेन प्राप्ता हि काशिका ॥ ४ ॥

kāśyāṃ hi kāśate kāśī kāśī sarvaprakāśikā ;
sā kāśī viditā yena tena prāptā hi kāśikā . 4 .

काशीक्षेत्रं शरीरं त्रिभुवनजननी व्यापिनी ज्ञानगङ्गा
भक्तिः श्रद्धा गयेयं निजगुरुचरणध्यानयोगः प्रयागः ।
विश्वेशोऽयं तुरीयः सकलजनमनःसाक्षिभूतोऽन्तरात्मा
देहे सर्वं मदीये यदि वसति पुनस्तीर्थमन्यत्किमस्ति ॥ ५ ॥

kāśīkṣetraṃ śarīraṃ tribhuvanajananī vyāpinī jñānagaṅgā
bhaktiḥ śraddhā gayeyaṃ nijagurucaraṇadhyānayogaḥ prayāgaḥ ;
viśveśo’yaṃ turīyaḥ sakalajanamanaḥsākṣibhūto’ntarātmā
dehe sarvaṃ madīye yadi vasati punastīrthamanyatkimasti . 5 .