त्वत्प्रभुजीवप्रियमिच्छसि चेन्नरहरिपूजां कुरु सततं
प्रतिबिम्बालङ्कृतिधृतिकुशलो बिम्बालङ्कृतिमातनुते ।
चेतोभृङ्ग भ्रमसि वृथा भवमरुभूमौ विरसायां
भज भज लक्ष्मीनरसिंहानघपदसरसिजमकरन्दम् ॥ १ ॥

tvatprabhujīvapriyamicchasi cennaraharipūjāṃ kuru satataṃ
pratibimbālaṅkṛtidhṛtikuśalo bimbālaṅkṛtimātanute ;
cetobhṛṅga bhramasi vṛthā bhavamarubhūmau virasāyāṃ
bhaja bhaja lakṣmīnarasiṃhānaghapadasarasijamakarandam . 1 .

शुक्तौ रजतप्रतिभा जाता कटकाद्यर्थसमर्था चे-
द्दुःखमयी ते संसृतिरेषा निर्वृतिदाने निपुणा स्यात् ।
चेतोभृङ्ग भ्रमसि वृथा भवमरुभूमौ विरसायां
भज भज लक्ष्मीनरसिंहानघपदसरसिजमकरन्दम् ॥ २ ॥

śuktau rajatapratibhā jātā kaṭakādyarthasamarthā ce-
dduḥkhamayī te saṃsṛtireṣā nirvṛtidāne nipuṇā syāt ;
cetobhṛṅga bhramasi vṛthā bhavamarubhūmau virasāyāṃ
bhaja bhaja lakṣmīnarasiṃhānaghapadasarasijamakarandam . 2 .

आकृतिसाम्याच्छाल्मलिकुसुमे स्थलनलिनत्वभ्रममकरोः
गन्धरसाविह किमु विद्येते विफलं भ्राम्यसि भृशविरसेऽस्मिन् ।
चेतोभृङ्ग भ्रमसि वृथा भवमरुभूमौ विरसायां
भज भज लक्ष्मीनरसिंहानघपदसरसिजमकरन्दम् ॥ ३ ॥

ākṛtisāmyācchālmalikusume sthalanalinatvabhramamakaroḥ
gandharasāviha kimu vidyete viphalaṃ bhrāmyasi bhṛśavirase’smin ;
cetobhṛṅga bhramasi vṛthā bhavamarubhūmau virasāyāṃ
bhaja bhaja lakṣmīnarasiṃhānaghapadasarasijamakarandam . 3 .

स्रक्चन्दनवनितादीन्विषयान्सुखदान्मत्वा तत्र विहरसे
गन्धफलीसदृशा ननु तेऽमी भोगानन्तरदुःखकृतः स्युः ।
चेतोभृङ्ग भ्रमसि वृथा भवमरुभूमौ विरसायां
भज भज लक्ष्मीनरसिंहानघपदसरसिजमकरन्दम् ॥ ४ ॥

srakcandanavanitādīnviṣayānsukhadānmatvā tatra viharase
gandhaphalīsadṛśā nanu te’mī bhogānantaraduḥkhakṛtaḥ syuḥ ;
cetobhṛṅga bhramasi vṛthā bhavamarubhūmau virasāyāṃ
bhaja bhaja lakṣmīnarasiṃhānaghapadasarasijamakarandam . 4 .

तव हितमेकं वचनं वक्ष्ये शृणु सुखकामो यदि सततं
स्वप्ने दृष्टं सकलं हि मृषा जाग्रति च स्मर तद्वदिति ।
चेतोभृङ्ग भ्रमसि वृथा भवमरुभूमौ विरसायां
भज भज लक्ष्मीनरसिंहानघपदसरसिजमकरन्दम् ॥ ५ ॥

tava hitamekaṃ vacanaṃ vakṣye śṛṇu sukhakāmo yadi satataṃ
svapne dṛṣṭaṃ sakalaṃ hi mṛṣā jāgrati ca smara tadvaditi ;
cetobhṛṅga bhramasi vṛthā bhavamarubhūmau virasāyāṃ
bhaja bhaja lakṣmīnarasiṃhānaghapadasarasijamakarandam . 5 .