श्रीशात्मभूमुख्यसुरार्चिताङ्घ्रिं श्रीकण्ठशर्वादिपदाभिधेयम् ।
श्रीशङ्कराचार्यहृदब्जवासं श्रीचन्द्रमौलीशमहं नमामि ॥ १

śrīśātmabhūmukhyasurārcitāṅghriṃ śrīkaṇṭhaśarvādipadābhidheyam ;
śrīśaṅkarācāryahṛdabjavāsaṃ śrīcandramaulīśamahaṃ namāmi . 1

चण्डांशुशीतांशुकृशानुनेत्रं चण्डीशमुख्यप्रमथेड्यपादम् ।
षडास्यनागास्यसुशोभिपार्श्वं श्रीचन्द्रमौलीशमहं नमामि ॥ २

caṇḍāṃśuśītāṃśukṛśānunetraṃ caṇḍīśamukhyapramatheḍyapādam ;
ṣaḍāsyanāgāsyasuśobhipārśvaṃ śrīcandramaulīśamahaṃ namāmi . 2

द्रव्यादिसृष्टिस्थितिनाशहेतुं रव्यादितेजांस्यपि भासयन्तम् ।
पव्यायुधादिस्तुतवैभवं तं श्रीचन्द्रमौलीशमहं नमामि ॥ ३

dravyādisṛṣṭisthitināśahetuṃ ravyāditejāṃsyapi bhāsayantam ;
pavyāyudhādistutavaibhavaṃ taṃ śrīcandramaulīśamahaṃ namāmi . 3

मौलिस्पुरज्जह्नुसुतासितांशुं व्यालेशसंवेष्टितपाणिपादम् ।
शूलादिनानायुधशोभमानं श्रीचन्द्रमौलीशमहं नमामि ॥ ४

maulispurajjahnusutāsitāṃśuṃ vyāleśasaṃveṣṭitapāṇipādam ;
śūlādinānāyudhaśobhamānaṃ śrīcandramaulīśamahaṃ namāmi . 4

लीलाविनिर्धूतकृतान्तदर्पं शैलात्मजासंश्रितवामभागम् ।
शूलाग्रनिर्भिन्नसुरारिसङ्घं श्रीचन्द्रमौलीशमहं नमामि ॥ ५

līlāvinirdhūtakṛtāntadarpaṃ śailātmajāsaṃśritavāmabhāgam ;
śūlāgranirbhinnasurārisaṅghaṃ śrīcandramaulīśamahaṃ namāmi . 5

शतैः श्रुतीनां परिगीयमानं यतैर्मुनीन्द्रैः परिसेव्यमानम् ।
नतैः सुरेन्द्रैरभिपूज्यमानं श्रीचन्द्रमौलीशमहं नमामि ॥ ६

śataiḥ śrutīnāṃ parigīyamānaṃ yatairmunīndraiḥ parisevyamānam ;
nataiḥ surendrairabhipūjyamānaṃ śrīcandramaulīśamahaṃ namāmi . 6

मत्तेभकृत्या परिशोभिताङ्गं चित्ते यतीनां सततं वसन्तम् ।
वित्तेशमुख्यैः परिवेष्टितं तं श्रीचन्द्रमौलीशमहं नमामि ॥ ७

mattebhakṛtyā pariśobhitāṅgaṃ citte yatīnāṃ satataṃ vasantam ;
vitteśamukhyaiḥ pariveṣṭitaṃ taṃ śrīcandramaulīśamahaṃ namāmi . 7

हंसोत्तमैः चेतसि चिन्त्यमानं संसारपाथोनिधिकर्णधारम् ।
तं सामगानप्रियमष्टमूर्तिं श्रीचन्द्रमौलीशमहं नमामि ॥ ८

haṃsottamaiḥ cetasi cintyamānaṃ saṃsārapāthonidhikarṇadhāram ;
taṃ sāmagānapriyamaṣṭamūrtiṃ śrīcandramaulīśamahaṃ namāmi . 8

नताघहं नित्यचिदेकरूपं सतां गतिं सत्यसुखस्वरूपम् ।
हतान्धकं हृद्यपराक्रमं तं श्रीचन्द्रमौलीशमहं नमामि ॥ ९

natāghahaṃ nityacidekarūpaṃ satāṃ gatiṃ satyasukhasvarūpam ;
hatāndhakaṃ hṛdyaparākramaṃ taṃ śrīcandramaulīśamahaṃ namāmi . 9

मायातिगं वीतभयं विनिद्रं मोहान्तकं मृत्युहरं महेशम् ।
फालानलं नीलगलं कृपालुं श्रीचन्द्रमौलीशमहं नमामि ॥ १०

māyātigaṃ vītabhayaṃ vinidraṃ mohāntakaṃ mṛtyuharaṃ maheśam ;
phālānalaṃ nīlagalaṃ kṛpāluṃ śrīcandramaulīśamahaṃ namāmi . 10

मित्रं हि यस्याखिलशेवधीशः पुत्रश्च विघ्नौघविभेददक्षः ।
पात्रं कृपायाश्च समस्तलोकः श्रीचन्द्रमौलीशमहं नमामि ॥ ११

mitraṃ hi yasyākhilaśevadhīśaḥ putraśca vighnaughavibhedadakṣaḥ ;
pātraṃ kṛpāyāśca samastalokaḥ śrīcandramaulīśamahaṃ namāmi . 11