चन्द्रशेखर चन्द्रशेखर चन्द्रशेखर पाहि माम् ।
चन्द्रशेखर चन्द्रशेखर चन्द्रशेखर रक्ष माम् ॥

candraśekhara candraśekhara candraśekhara pāhi mām ;
candraśekhara candraśekhara candraśekhara rakṣa mām .

रत्नसानुशरासनं रजताद्रिशृङ्गनिकेतनं
शिञ्जिनीकृतपन्नगेश्वरमच्युतानलसायकम्।
क्षिप्रदग्धपुरत्रयं त्रिदिवालयैरभिवन्दितं
चन्द्रशेखरमाश्रये मम किं करिष्यति वै यमः ॥ १ ॥

ratnasānuśarāsanaṃ rajatādriśṛṅganiketanaṃ
śiñjinīkṛtapannageśvaramacyutānalasāyakam;
kṣipradagdhapuratrayaṃ tridivālayairabhivanditaṃ
candraśekharamāśraye mama kiṃ kariṣyati vai yamaḥ . 1 .

पञ्चपादपपुष्पगन्धपदाम्बुजद्वयशोभितं
फाललोचन जातपावक दग्धमन्मथविग्रहम् ।
भस्मदिग्धकलेबरं भवनाशनं भवमव्ययं
चन्द्रशेखरमाश्रये मम किं करिष्यति वै यमः ॥ २ ॥

pañcapādapapuṣpagandhapadāmbujadvayaśobhitaṃ
phālalocana jātapāvaka dagdhamanmathavigraham ;
bhasmadigdhakalebaraṃ bhavanāśanaṃ bhavamavyayaṃ
candraśekharamāśraye mama kiṃ kariṣyati vai yamaḥ . 2 .

मत्तवारणमुख्यचर्मकृतोत्तरीय मनोहरं
पङ्कजासन पद्मलोचन पूजिताङ्घ्रि सरोरुहम् ।
देवसिन्धुतरङ्गशीकर-सिक्तशुभ्रजटाधरं
चन्द्रशेखरमाश्रये मम किं करिष्यति वै यमः ॥ ३ ॥

mattavāraṇamukhyacarmakṛtottarīya manoharaṃ
paṅkajāsana padmalocana pūjitāṅghri saroruham ;
devasindhutaraṅgaśīkara-siktaśubhrajaṭādharaṃ
candraśekharamāśraye mama kiṃ kariṣyati vai yamaḥ . 3 .

यक्षराजसखं भगाक्षहरं भुजङ्गविभूषणं
शैलराजसुतापरिष्कृत-चारुवामकलेबरम् ।
क्ष्वेलनीलगलं परश्वधधारिणं मृगधारिणं
चन्द्रशेखरमाश्रये मम किं करिष्यति वै यमः ॥ ४ ॥

yakṣarājasakhaṃ bhagākṣaharaṃ bhujaṅgavibhūṣaṇaṃ
śailarājasutāpariṣkṛta-cāruvāmakalebaram ;
kṣvelanīlagalaṃ paraśvadhadhāriṇaṃ mṛgadhāriṇaṃ
candraśekharamāśraye mama kiṃ kariṣyati vai yamaḥ . 4 .

कुण्डलीकृतकुण्डलेश्वरकुण्डलं वृषवाहनं
नारदादिमुनीश्वरस्तुतवैभवं भुवनेश्वरम् ।
अन्धकान्तकमाश्रितामरपादपं शमनान्तकं
चन्द्रशेखरमाश्रये मम किं करिष्यति वै यमः ॥ ५ ॥

kuṇḍalīkṛtakuṇḍaleśvarakuṇḍalaṃ vṛṣavāhanaṃ
nāradādimunīśvarastutavaibhavaṃ bhuvaneśvaram ;
andhakāntakamāśritāmarapādapaṃ śamanāntakaṃ
candraśekharamāśraye mama kiṃ kariṣyati vai yamaḥ . 5 .

भेषजं भवरोगिणामखिलापदामपहारिणं
दक्षयज्ञविनाशनं त्रिगुणात्मकं त्रिविलोचनम् ।
भुक्तिमुक्तिफलप्रदं सकलाघसङ्घनिबर्हणं
चन्द्रशेखरमाश्रये मम किं करिष्यति वै यमः ॥ ६ ॥

bheṣajaṃ bhavarogiṇāmakhilāpadāmapahāriṇaṃ
dakṣayajñavināśanaṃ triguṇātmakaṃ trivilocanam ;
bhuktimuktiphalapradaṃ sakalāghasaṅghanibarhaṇaṃ
candraśekharamāśraye mama kiṃ kariṣyati vai yamaḥ . 6 .

भक्तवत्सलमर्चितं निधिमक्षयं हरिदम्बरं
सर्वभूतपतिं परात्परमप्रमेयमनुत्तमम् ।
सोमवारुण भूहुताशन सोमपानिखिलाकृतिं
चन्द्रशेखरमाश्रये मम किं करिष्यति वै यमः ॥ ७ ॥

bhaktavatsalamarcitaṃ nidhimakṣayaṃ haridambaraṃ
sarvabhūtapatiṃ parātparamaprameyamanuttamam ;
somavāruṇa bhūhutāśana somapānikhilākṛtiṃ
candraśekharamāśraye mama kiṃ kariṣyati vai yamaḥ . 7 .

विश्वसृष्टिविधायिनं पुनरेव पालनतत्परं
संहरन्तमपिप्रपञ्चमशेषलोकनिवासिनम् ।
क्रीडयन्तमहर्निशं गणनाथयूथसमन्वितं
चन्द्रशेखरमाश्रये मम किं करिष्यति वै यमः ॥ ८ ॥

viśvasṛṣṭividhāyinaṃ punareva pālanatatparaṃ
saṃharantamapiprapañcamaśeṣalokanivāsinam ;
krīḍayantamaharniśaṃ gaṇanāthayūthasamanvitaṃ
candraśekharamāśraye mama kiṃ kariṣyati vai yamaḥ . 8 .

मृत्युभीत मृकण्डुसूनुकृतस्तवं शिवसन्निधौ
यत्र कुत्र च यः पठेन्न हि तस्य मृत्युभयं भवेत् ।
पूर्णमायुररोगतामखिलार्थसम्पदमादरं
चन्द्रशेखर एव तस्य ददाति मुक्तिमयत्नतः ॥ ९ ॥

mṛtyubhīta mṛkaṇḍusūnukṛtastavaṃ śivasannidhau
yatra kutra ca yaḥ paṭhenna hi tasya mṛtyubhayaṃ bhavet ;
pūrṇamāyurarogatāmakhilārthasampadamādaraṃ
candraśekhara eva tasya dadāti muktimayatnataḥ . 9 .