सौराष्ट्रदेशे वसुधावकाशे
ज्योतिर्मयं चन्द्रकलावतंसम् ।
भक्तिप्रदानाय कृतावतारं
तं सोमनाथं शरणं प्रपद्ये ॥ १ ॥

saurāṣṭradeśe vasudhāvakāśe
jyotirmayaṃ candrakalāvataṃsam ;
bhaktipradānāya kṛtāvatāraṃ
taṃ somanāthaṃ śaraṇaṃ prapadye . 1 .

श्रीशैलशृङ्गे विविधप्रसङ्गे
शेषाद्रिशृङ्गेऽपि सदा वसन्तम् ।
तमर्जुनं मल्लिकपूर्वमेनं
नमामि संसारसमुद्रसेतुम् ॥ २ ॥

śrīśailaśṛṅge vividhaprasaṅge
śeṣādriśṛṅge’pi sadā vasantam ;
tamarjunaṃ mallikapūrvamenaṃ
namāmi saṃsārasamudrasetum . 2 .

अवन्तिकायां विहितावतारं
मुक्तिप्रदानाय च सज्जनानाम् ।
अकालमृत्योः परिरक्षणार्थं
वन्दे महाकालमहं सुरेशम् ॥ ३ ॥

avantikāyāṃ vihitāvatāraṃ
muktipradānāya ca sajjanānām ;
akālamṛtyoḥ parirakṣaṇārthaṃ
vande mahākālamahaṃ sureśam . 3 .

कावेरिकानर्मदयोः पवित्रे
समागमे सज्जनतारणाय ।
सदैव मान्धातृपुरे वसन्त-
मोङ्कारमीशं शिवमेकमीडे ॥ ४ ॥

kāverikānarmadayoḥ pavitre
samāgame sajjanatāraṇāya ;
sadaiva māndhātṛpure vasanta-
moṅkāramīśaṃ śivamekamīḍe . 4 .

पूर्वोत्तरे पारलिकाभिधाने
सदाशिवं तं गिरिजासमेतम् ।
सुरासुराराधितपादपद्मं
श्रीवैद्यनाथं सततं स्मरामि ॥ ५ ॥

pūrvottare pāralikābhidhāne
sadāśivaṃ taṃ girijāsametam ;
surāsurārādhitapādapadmaṃ
śrīvaidyanāthaṃ satataṃ smarāmi . 5 .

आमर्दसंज्ञे नगरे च रम्ये
विभूषिताङ्गं विविधैश्च भोगैः ।
सद्भक्तिमुक्तिप्रदमीशमेकं
श्रीनागनाथं शरणं प्रपद्ये ॥ ६ ॥

āmardasaṃjñe nagare ca ramye
vibhūṣitāṅgaṃ vividhaiśca bhogaiḥ ;
sadbhaktimuktipradamīśamekaṃ
śrīnāganāthaṃ śaraṇaṃ prapadye . 6 .

सानन्दमानन्दवने वसन्त-
मानन्दकन्दं हतपापबृन्दम् ।
वाराणसीनाथमनाथनाथं
श्रीविश्वनाथं शरणं प्रपद्ये ॥ ७ ॥

sānandamānandavane vasanta-
mānandakandaṃ hatapāpabṛndam ;
vārāṇasīnāthamanāthanāthaṃ
śrīviśvanāthaṃ śaraṇaṃ prapadye . 7 .

यो डाकिनीशाकिनिकासमाजे
निषेव्यमाणः पिशिताशनैश्च ।
सदैव भीमादिपदप्रसिद्धं
तं शङ्करं भक्तहितं नमामि ॥ ८ ॥

yo ḍākinīśākinikāsamāje
niṣevyamāṇaḥ piśitāśanaiśca ;
sadaiva bhīmādipadaprasiddhaṃ
taṃ śaṅkaraṃ bhaktahitaṃ namāmi . 8 .

श्रीताम्रपर्णीजलराशियोगे
निबद्ध्य सेतुं निशि बिल्वपत्रैः ।
श्रीरामचन्द्रेण समर्चितं तं
रामेश्वराख्यं सततं नमामि ॥ ९ ॥

śrītāmraparṇījalarāśiyoge
nibaddhya setuṃ niśi bilvapatraiḥ ;
śrīrāmacandreṇa samarcitaṃ taṃ
rāmeśvarākhyaṃ satataṃ namāmi . 9 .

सिंहाद्रिपार्श्वेऽपि तटे रमन्तं
गोदावरीतीरपवित्रदेशे ।
यद्दर्शनात्पातकजातनाशः
प्रजायते त्र्यम्बकमीशमीडे ॥ १० ॥

siṃhādripārśve’pi taṭe ramantaṃ
godāvarītīrapavitradeśe ;
yaddarśanātpātakajātanāśaḥ
prajāyate tryambakamīśamīḍe . 10 .

हिमाद्रिपार्श्वेऽपि तटे रमन्तं
सम्पूज्यमानं सततं मुनीन्द्रैः ।
सुरासुरैर्यक्षमहोरगाद्यैः
केदारसंज्ञं शिवमीशमीडे ॥ ११ ॥

himādripārśve’pi taṭe ramantaṃ
sampūjyamānaṃ satataṃ munīndraiḥ ;
surāsurairyakṣamahoragādyaiḥ
kedārasaṃjñaṃ śivamīśamīḍe . 11 .

एलापुरीरम्यशिवालयेऽस्मिन्
समुल्लसन्तं त्रिजगद्वरेण्यम् ।
वन्दे महोदारतरस्वभावं
सदाशिवं तं धिषणेश्वराख्यम् ॥ १२ ॥

elāpurīramyaśivālaye’smin
samullasantaṃ trijagadvareṇyam ;
vande mahodāratarasvabhāvaṃ
sadāśivaṃ taṃ dhiṣaṇeśvarākhyam . 12 .

एतानि लिङ्गानि सदैव मर्त्याः
प्रातः पठन्तोऽमलमानसाश्च ।
ते पुत्रपौत्रैश्च धनैरुदारैः
सत्कीर्तिभाजः सुखिनो भवन्ति ॥ १३ ॥

etāni liṅgāni sadaiva martyāḥ
prātaḥ paṭhanto’malamānasāśca ;
te putrapautraiśca dhanairudāraiḥ
satkīrtibhājaḥ sukhino bhavanti . 13 .