कदाचित्कालिन्दीतटविपिनसङ्गीतकवरो
मुदा गोपीनारीवदनकमलास्वादमधुपः ।
रमाशम्भुब्रह्मामरपतिगणेशार्चितपदो
जगन्नाथः स्वामी नयनपथगामी भवतु मे ॥ १ ॥

kadācitkālindītaṭavipinasaṅgītakavaro
mudā gopīnārīvadanakamalāsvādamadhupaḥ ;
ramāśambhubrahmāmarapatigaṇeśārcitapado
jagannāthaḥ svāmī nayanapathagāmī bhavatu me . 1 .

भुजे सव्ये वेणुं शिरसि शिखिपिञ्छं कटितटे
दुकूलं नेत्रान्ते सहचरकटाक्षं च विदधत् ।
सदा श्रीमद्बृन्दावनवसतिलीलापरिचयो
जगन्नाथः स्वामी नयनपथगामी भवतु मे ॥ २ ॥

bhuje savye veṇuṃ śirasi śikhipiñchaṃ kaṭitaṭe
dukūlaṃ netrānte sahacarakaṭākṣaṃ ca vidadhat ;
sadā śrīmadbṛndāvanavasatilīlāparicayo
jagannāthaḥ svāmī nayanapathagāmī bhavatu me . 2 .

महाम्भोधेस्तीरे कनकरुचिरे नीलशिखरे
वसन्प्रासादान्तः सहजबलभद्रेण बलिना ।
सुभद्रामध्यस्थः सकलसुरसेवावसरदो
जगन्नाथः स्वामी नयनपथगामी भवतु मे ॥ ३ ॥

mahāmbhodhestīre kanakarucire nīlaśikhare
vasanprāsādāntaḥ sahajabalabhadreṇa balinā ;
subhadrāmadhyasthaḥ sakalasurasevāvasarado
jagannāthaḥ svāmī nayanapathagāmī bhavatu me . 3 .

कृपापारावारः सजलजलदश्रेणिरुचिरो
रमावाणीसोमस्फुरदमलपद्मोद्भवमुखैः ।
सुरेन्द्रैराराध्यः श्रुतिगणशिखागीतचरितो
जगन्नाथः स्वामी नयनपथगामी भवतु मे ॥ ४ ॥

kṛpāpārāvāraḥ sajalajaladaśreṇiruciro
ramāvāṇīsomasphuradamalapadmodbhavamukhaiḥ ;
surendrairārādhyaḥ śrutigaṇaśikhāgītacarito
jagannāthaḥ svāmī nayanapathagāmī bhavatu me . 4 .

रथारूढो गच्छन्पथि मिलितभूदेवपटलैः
स्तुतिप्रादुर्भावं प्रतिपदमुपाकर्ण्य सदयः ।
दयासिन्धुर्बन्धुः सकलजगतां सिन्धुसुतया
जगन्नाथः स्वामी नयनपथगामी भवतु मे ॥ ५ ॥

rathārūḍho gacchanpathi militabhūdevapaṭalaiḥ
stutiprādurbhāvaṃ pratipadamupākarṇya sadayaḥ ;
dayāsindhurbandhuḥ sakalajagatāṃ sindhusutayā
jagannāthaḥ svāmī nayanapathagāmī bhavatu me . 5 .

परब्रह्मापीडः कुवलयदलोत्फुल्लनयनो
निवासी नीलाद्रौ निहितचरणोऽनन्तशिरसि ।
रसानन्दो राधासरसवपुरालिङ्गनसुखो
जगन्नाथः स्वामी नयनपथगामी भवतु मे ॥ ६ ॥

parabrahmāpīḍaḥ kuvalayadalotphullanayano
nivāsī nīlādrau nihitacaraṇo’nantaśirasi ;
rasānando rādhāsarasavapurāliṅganasukho
jagannāthaḥ svāmī nayanapathagāmī bhavatu me . 6 .

न वै प्रार्थ्यं राज्यं न च कनकता भोगविभवे
न याचेऽहं रम्यां निखिलजनकाम्यां वरवधूम् ।
सदा काले काले प्रमथपतिना गीतचरितो
जगन्नाथः स्वामी नयनपथगामी भवतु मे ॥ ७ ॥

na vai prārthyaṃ rājyaṃ na ca kanakatā bhogavibhave
na yāce’haṃ ramyāṃ nikhilajanakāmyāṃ varavadhūm ;
sadā kāle kāle pramathapatinā gītacarito
jagannāthaḥ svāmī nayanapathagāmī bhavatu me . 7 .

हर त्वं संसारं द्रुततरमसारं सुरपते
हर त्वं पापानां विततिमपरां यादवपते ।
अहो दीनानाथं निहितमचलं पातुमनिशं
जगन्नाथः स्वामी नयनपथगामी भवतु मे ॥ ८ ॥

hara tvaṃ saṃsāraṃ drutataramasāraṃ surapate
hara tvaṃ pāpānāṃ vitatimaparāṃ yādavapate ;
aho dīnānāthaṃ nihitamacalaṃ pātumaniśaṃ
jagannāthaḥ svāmī nayanapathagāmī bhavatu me . 8 .