अविनयमपनय विष्णो
दमय मनः शमय मृगतृष्णाम् ।
भूतदयां विस्तारय
तारय संसारसागरतः ॥ १ ॥

avinayamapanaya viṣṇo
damaya manaḥ śamaya mṛgatṛṣṇām ;
bhūtadayāṃ vistāraya
tāraya saṃsārasāgarataḥ . 1 .

दिव्यधुनीमकरन्दे
परिमलपरिभोगसच्चिदानन्दे ।
श्रीपतिपदारविन्दे
भवभयखेदच्छिदे वन्दे ॥ २ ॥

divyadhunīmakarande
parimalaparibhogasaccidānande ;
śrīpatipadāravinde
bhavabhayakhedacchide vande . 2 .

सत्यपि भेदापगमे
नाथ तवाहं न मामकीनस्त्वम् ।
सामुद्रो हि तरङ्गः
क्वचन समुद्रो न तारङ्गः ॥ ३ ॥

satyapi bhedāpagame
nātha tavāhaṃ na māmakīnastvam ;
sāmudro hi taraṅgaḥ
kvacana samudro na tāraṅgaḥ . 3 .

उद्घृतनग नगभिदनुज
दनुजकुलामित्र मित्रशशिदृष्टे ।
दृष्टे भवति प्रभवति
न भवति किं भवतिरस्कारः ॥ ४ ॥

udghṛtanaga nagabhidanuja
danujakulāmitra mitraśaśidṛṣṭe ;
dṛṣṭe bhavati prabhavati
na bhavati kiṃ bhavatiraskāraḥ . 4 .

मत्स्यादिभिरवतारैरवतारवतावता सदा वसुधाम् ।
परमेश्वर परिपाल्यो भवता भवतापभीतोऽहम् ॥ ५ ॥

matsyādibhiravatārairavatāravatāvatā sadā vasudhām ;
parameśvara paripālyo bhavatā bhavatāpabhīto’ham . 5 .

दामोदर गुणमन्दिर सुन्दरवदनारविन्द गोविन्द ।
भवजलधिमथनमन्दर परमं दरमपनय त्वं मे ॥ ६ ॥

dāmodara guṇamandira sundaravadanāravinda govinda ;
bhavajaladhimathanamandara paramaṃ daramapanaya tvaṃ me . 6 .

नारायण करुणामय शरणं करवाणि तावकौ चरणौ ।
इति षट्पदी मदीये वदनसरोजे सदा वसतु ॥ ७ ॥

nārāyaṇa karuṇāmaya śaraṇaṃ karavāṇi tāvakau caraṇau ;
iti ṣaṭpadī madīye vadanasaroje sadā vasatu . 7 .