अज्ञानध्वान्तविध्वंसिसहस्रकरतेजसम् ।
सच्चित्सुखात्मकब्रह्मनिविष्टहृदयाम्बुजम् ॥ १ ॥

ajñānadhvāntavidhvaṃsisahasrakaratejasam ;
saccitsukhātmakabrahmaniviṣṭahṛdayāmbujam . 1 .

पद्मासनोपविष्टञ्च ध्यानस्तिमितलोचनम् ।
समं कायशिरोग्रीवं धारयन्तं महाप्रभम् ॥ २ ॥

padmāsanopaviṣṭañca dhyānastimitalocanam ;
samaṃ kāyaśirogrīvaṃ dhārayantaṃ mahāprabham . 2 .

सहस्रकिरणस्पर्धिदेहकान्तिसमुज्ज्वलम् ।
निर्विकल्पसमाधिस्थं निश्चलावयवं शिवम् ॥ ३ ॥

sahasrakiraṇaspardhidehakāntisamujjvalam ;
nirvikalpasamādhisthaṃ niścalāvayavaṃ śivam . 3 .

देहादिब्रह्मपर्यन्ते भोग्ये तुच्छत्वधीयुतम् ।
आर्तानामार्तिहन्तारं जिज्ञासुविशयच्छिदम् ॥ ४ ॥

dehādibrahmaparyante bhogye tucchatvadhīyutam ;
ārtānāmārtihantāraṃ jijñāsuviśayacchidam . 4 .

स्वावलोकनमात्रेण पुनानं निखिलं जगत् ।
मदीयहृत्सरोजातनिवेशितपदद्वयम् ।
विद्यातीर्थगुरूत्तंसं ध्यायामि भवमुक्तये ॥ ५ ॥

svāvalokanamātreṇa punānaṃ nikhilaṃ jagat ;
madīyahṛtsarojātaniveśitapadadvayam ;
vidyātīrthagurūttaṃsaṃ dhyāyāmi bhavamuktaye . 5 .