आर्याम्बाशिवगुर्वोश्च लक्ष्म्यम्बारामशास्त्रिणोः।
पुत्रत्वेनावतीर्णो यो धर्मसंरक्षणाय वै ॥ १ ॥

āryāmbāśivagurvośca lakṣmyambārāmaśāstriṇoḥ;
putratvenāvatīrṇo yo dharmasaṃrakṣaṇāya vai . 1 .

अष्टमे हायने यश्च तुर्यमाश्रममग्रहीत्।
प्रस्थानत्रयभाष्यादेर्लेखको द्योतकश्च यः ॥ २ ॥

aṣṭame hāyane yaśca turyamāśramamagrahīt;
prasthānatrayabhāṣyāderlekhako dyotakaśca yaḥ . 2 .

शृङ्गेर्यां शारदापीठं स्थापयामास यो महान् ।
अध्यतिष्ठच्च तत्पीठं लोकानुद्धर्तुमेव यः ॥ ३ ॥

śṛṅgeryāṃ śāradāpīṭhaṃ sthāpayāmāsa yo mahān ;
adhyatiṣṭhacca tatpīṭhaṃ lokānuddhartumeva yaḥ . 3 .

कालट्यां यो जनिं लेभे यश्च तामुद्दधार ह ।
शृङ्गेर्यां शारदां यश्च स्थापयामास सद्गुरुः ॥ ४ ॥

kālaṭyāṃ yo janiṃ lebhe yaśca tāmuddadhāra ha ;
śṛṅgeryāṃ śāradāṃ yaśca sthāpayāmāsa sadguruḥ . 4 .

तामेव कालटीक्षेत्रे यः पुनः प्रत्यतिष्ठिपत् ।
शङ्करः सच्चिदानन्दशिवाभिनवपूर्वकः ॥ ५ ॥

tāmeva kālaṭīkṣetre yaḥ punaḥ pratyatiṣṭhipat ;
śaṅkaraḥ saccidānandaśivābhinavapūrvakaḥ . 5 .

नृसिंहभारती चेति नामद्वयविराजितम् ।
जगद्गुरुमहं वन्दे लोकानुग्रहदीक्षितम् ॥ ६ ॥

nṛsiṃhabhāratī ceti nāmadvayavirājitam ;
jagadgurumahaṃ vande lokānugrahadīkṣitam . 6 .