जगत्प्रतिष्ठाहेतुर्यः धर्मः श्रुत्यन्तकीर्तितः । तस्याऽपि शास्ता यो देवः तं सदा समुपाश्रये ॥ १ ॥

jagatpratiṣṭhāheturyaḥ dharmaḥ śrutyantakīrtitaḥ ; tasyā’pi śāstā yo devaḥ taṃ sadā samupāśraye . 1 .

श्रीशङ्करार्यैर्हि शिवावतारैः धर्मप्रचाराय समस्तकाले । सुस्थापितं शृङ्गमहीध्रवर्ये पीठं यतीन्द्राः परिभूषयन्ति ॥ २ ॥

śrīśaṅkarāryairhi śivāvatāraiḥ dharmapracārāya samastakāle ; susthāpitaṃ śṛṅgamahīdhravarye pīṭhaṃ yatīndrāḥ paribhūṣayanti . 2 .

तेष्वेव कर्मन्दिवरेषु विद्या- तपोधनेषु प्रथितानुभावः । विद्यासुतीर्थोऽभिनवोऽद्य योगी शास्तारमालोकयितुं प्रतस्थे ॥ ३ ॥

teṣveva karmandivareṣu vidyā- tapodhaneṣu prathitānubhāvaḥ ; vidyāsutīrtho’bhinavo’dya yogī śāstāramālokayituṃ pratasthe . 3 .

धर्मस्य गोप्ता यतिपुङ्गवोऽयं धर्मस्य शास्तारमवैक्षतेति । युक्तं तदेतद्ध्युभयोस्तयोर्हि सम्मेलनं लोकहिताय नूनम् ॥ ४ ॥

dharmasya goptā yatipuṅgavo’yaṃ dharmasya śāstāramavaikṣateti ; yuktaṃ tadetaddhyubhayostayorhi sammelanaṃ lokahitāya nūnam . 4 .

कालेऽस्मिन् कलिमलदूषितेऽपि धर्मः श्रौतोऽयं न खलु विलोपमाप तत्र । हेतुः खल्वयमिह नूनमेव नाऽन्यः शास्ताऽस्ते सकलजनैकवन्द्यपादः ॥ ५ ॥

kāle’smin kalimaladūṣite’pi dharmaḥ śrauto’yaṃ na khalu vilopamāpa tatra ; hetuḥ khalvayamiha nūnameva nā’nyaḥ śāstā’ste sakalajanaikavandyapādaḥ . 5 .

ज्ञानं षडास्यवरतातकृपैकलभ्यं मोक्षस्तु तार्क्ष्यवरवाहदयैकलभ्यः । ज्ञानं च मोक्ष उभयं तु विना श्रमेण प्राप्यं जनैः हरिहरात्मजसत्प्रसादात् ॥ ६ ॥

jñānaṃ ṣaḍāsyavaratātakṛpaikalabhyaṃ mokṣastu tārkṣyavaravāhadayaikalabhyaḥ ; jñānaṃ ca mokṣa ubhayaṃ tu vinā śrameṇa prāpyaṃ janaiḥ hariharātmajasatprasādāt . 6 .

यमनियमादिसमेतैः यतचित्तैर्योगिभिः सदा ध्येयम् । शास्तारं हृदि कलये धातारं सर्वलोकस्य ॥ ७ ॥

yamaniyamādisametaiḥ yatacittairyogibhiḥ sadā dhyeyam ; śāstāraṃ hṛdi kalaye dhātāraṃ sarvalokasya . 7 .

शबरगिरिनिवासः सर्वलोकैकपूज्यः नतजनसुखकारी नम्रहृत्तापहारी । त्रिदशदितिजसेव्यः स्वर्गमोक्षप्रदाता हरिहरसुतदेवः सन्ततं शं तनोतु ॥ ८ ॥

śabaragirinivāsaḥ sarvalokaikapūjyaḥ natajanasukhakārī namrahṛttāpahārī ; tridaśaditijasevyaḥ svargamokṣapradātā hariharasutadevaḥ santataṃ śaṃ tanotu . 8 .

इति दक्षिणाम्नाय-श्री-शृङ्गेरी-शारदा-पीठाधीश्वर- जगद्गुरुशङ्कराचार्य-अनन्तश्रीविभूषित-श्रीभारतीतीर्थ- महास्वामिविरचित-धर्मशास्ता-स्तोत्रम्

iti dakṣiṇāmnāya-śrī-śṛṅgerī-śāradā-pīṭhādhīśvara- jagadguruśaṅkarācārya-anantaśrīvibhūṣita-śrībhāratītīrtha- mahāsvāmiviracita-dharmaśāstā-stotram