कौसल्यासुत कुशिकात्मजमखरक्षणदीक्षित राम ।
मामुद्धर शरणागतरक्षक रविकुलदीपक राम ॥ १ ॥

kausalyāsuta kuśikātmajamakharakṣaṇadīkṣita rāma ;
māmuddhara śaraṇāgatarakṣaka ravikuladīpaka rāma . 1 .

दशरथनन्दन दितिसुतखण्डन दीनजनावन राम ।
पुरहरकार्मुकविदलनपण्डित पुरुषोत्तम रघुराम ॥ २ ॥

daśarathanandana ditisutakhaṇḍana dīnajanāvana rāma ;
puraharakārmukavidalanapaṇḍita puruṣottama raghurāma . 2 .

खरदूषणमुखदितिसुतकाननदावानलनिभ राम ।
शबरीगुहमुखभक्तवरार्चितपादाम्भोरुह राम ॥ ३ ॥

kharadūṣaṇamukhaditisutakānanadāvānalanibha rāma ;
śabarīguhamukhabhaktavarārcitapādāmbhoruha rāma . 3 .

वालिप्रमथन वातात्मजमुखकपिवरसेवित राम ।
वासवविधिमुखसुरवरसंस्तुत वारिजलोचन राम ॥ ४ ॥

vālipramathana vātātmajamukhakapivarasevita rāma ;
vāsavavidhimukhasuravarasaṃstuta vārijalocana rāma . 4 .

दशकन्धरमुखदानवमर्दन रक्षितभुवन राम ।
सीतानायक शीघ्रवरप्रद सर्वजगन्नुत राम ॥ ५ ॥

daśakandharamukhadānavamardana rakṣitabhuvana rāma ;
sītānāyaka śīghravaraprada sarvajagannuta rāma . 5 .

भर्मविभूषणभूषितविग्रह भाधीशानन राम ।
भक्तभारतीतीर्थसुसेवित भद्रगिरीश्वर राम ॥ ६ ॥

bharmavibhūṣaṇabhūṣitavigraha bhādhīśānana rāma ;
bhaktabhāratītīrthasusevita bhadragirīśvara rāma . 6 .